शेतात पिकणाऱ्या कच्च्या मालाची थेट विक्री करण्याऐवजी त्यावर प्रक्रिया करून बाजारात आणल्यास त्याचे मूल्य वाढते आणि शेतकऱ्यांच्या उत्पन्नातही भर पडू शकते. त्याचबरोबर ग्रामीण भागात स्थानिक पातळीवर रोजगाराच्या नव्या संधी निर्माण होऊ शकतात. याच उद्देशाने केंद्र शासनाच्या आर्थिक मदतीतून राबविण्यात येणारी प्रधानमंत्री सूक्ष्म अन्नप्रक्रिया उद्योग योजना (PMFME) धाराशिव जिल्ह्यात रोजगार आणि स्वयंरोजगारासाठी महत्त्वाची ठरत आहे.
जिल्ह्यात ५३७ प्रस्ताव मंजूर, ४५० उद्योग सुरू
योजनेअंतर्गत आतापर्यंत जिल्ह्यात ५३७ जणांचे प्रस्ताव मंजूर झाले असून, त्यापैकी ४५० अन्नप्रक्रिया उद्योग सुरू झाले आहेत. यामध्ये खवा उद्योग, गूळ उद्योग, डाळ उद्योग, बेदाणा प्रक्रिया, मसाला आणि पापड उद्योग यांचा समावेश आहे. स्थानिक पातळीवर उपलब्ध होणाऱ्या कच्च्या मालावर प्रक्रिया करून त्याचे मूल्यवर्धन करण्याची संधी या माध्यमातून उपलब्ध झाली आहे.
३५ टक्के अनुदान उपलब्ध
योजनेत एकूण पात्र प्रकल्प खर्चावर ३५ टक्के अनुदान उपलब्ध असल्याने उद्योग उभारणीसाठी आर्थिक आधार मिळतो. केंद्र सरकारने आत्मनिर्भर भारत पॅकेजअंतर्गत प्रधानमंत्री सूक्ष्म अन्नप्रक्रिया उद्योग योजना सुरू केली आहे. असंघटित व अनोंदणीकृत सूक्ष्म अन्नप्रक्रिया उद्योगांना बळकटी देणे हा या योजनेचा प्रमुख उद्देश आहे.
बेरोजगार, शेतकरी, बचत गट व कंपन्यांना संधी
योजनेचा लाभ केवळ वैयक्तिक उद्योजकांपुरता मर्यादित नाही. वैयक्तिक लाभार्थी, बचत गट, शेतकरी गट, संस्था, शेतकरी उत्पादक कंपनी तसेच ॲग्रो कंपनी यापैकी पात्र घटकांना अर्ज करता येतो. विशेष म्हणजे, योजनेचा लाभ घेण्यासाठी स्वतःच्या नावावर सातबारा असणे आवश्यक नाही. त्यामुळे स्वतःची जमीन नसतानाही पात्र व्यक्तींना अन्नप्रक्रिया उद्योग उभारण्यासाठी योजनेचा लाभ घेण्याची संधी उपलब्ध आहे.
प्रस्तावापासून मंजुरीपर्यंत मोफत मार्गदर्शन
योजनेचा प्रस्ताव तयार करताना किंवा अर्ज प्रक्रियेत अडचण येऊ नये यासाठी शासनाकडून मदत केली जात आहे. प्रत्येक तालुका कृषी अधिकारी कार्यालयात मानधन तत्त्वावर एका कर्मचाऱ्याची नियुक्ती करण्यात आली आहे. अर्जदारांना प्रस्ताव दाखल करण्यापासून त्याच्या मंजुरीपर्यंत मोफत मार्गदर्शन करण्यात येते. उद्योग मंजूर झाल्यानंतर तो व्यवस्थित चालविण्यासाठी शासनाकडून योजनेच्या निकषांनुसार ३५ टक्के अनुदान उपलब्ध करून दिले जाते.
अधिक माहिती व अर्ज प्रक्रिया
अधिक माहितीसाठी संबंधित गावातील सहाय्यक कृषी अधिकारी यांची मदत घेता येईल. अन्नप्रक्रिया उद्योग सुरू करण्यास इच्छुकांनी योजनेची सविस्तर माहिती आणि अर्ज प्रक्रियेसाठी प्रधानमंत्री सूक्ष्म अन्नप्रक्रिया उद्योग योजनेच्या अधिकृत संकेतस्थळाला pmfme.mofpi.gov.in भेट द्यावी. तसेच संबंधित तालुका कृषी अधिकारी कार्यालय किंवा जिल्हा अधीक्षक कृषी अधिकारी कार्यालय, धाराशिव येथे संपर्क साधता येईल.
कृषी विभागाचे आवाहन
धाराशिव जिल्ह्यात विविध प्रकारचा कच्चा माल मोठ्या प्रमाणावर उपलब्ध आहे. मात्र त्यावर प्रक्रिया करून मूल्यवर्धित उत्पादने बाजारात विकणाऱ्यांची संख्या तुलनेने कमी आहे. त्यामुळे जिल्ह्यात अन्नप्रक्रिया उद्योग वाढल्यास स्थानिक शेतमालाला बाजारपेठ मिळण्याबरोबरच नवउद्योजकांनाही उत्पन्नाचा मार्ग उपलब्ध होऊ शकतो. जिल्ह्यातील जास्तीत जास्त पात्र व्यक्ती, शेतकरी, बचत गट, शेतकरी गट, संस्था आणि कंपन्यांनी योजनेसाठी अर्ज करून लाभ घ्यावा, असे आवाहन कृषी विभाग, धाराशिव यांच्या वतीने करण्यात आले आहे.
माहितीचा अधिकृत स्रोत: जिल्हा माहिती कार्यालय, धाराशिव
मुख्य विश्लेषक (सरकारी योजना व कृषी क्षेत्र)